陳志雲的網上節目《Stephen．傾》已經播出第100集，稍後將會暫停作小休，他坦言甚是不捨，故此特別珍惜第100集，所以邀請女團COLLAR擔任壓軸嘉賓，8位成員分別細說自己的過去。Winka（陳泳伽）和Marf（邱彥筒）一時感觸起來，聽到喊，Winka哭著說：「我連Gao讀電影都唔知。」
同場加映：REBOUND丨Alton隔7個月先覆短訊認衰仔 AK稱入行爆忙感激圈外老友諒解
Gao（沈貞巧）雖然已經擔任隊長一段時間，但仍對於這個崗位感到很空泛，她更指自己矮，所以不認為自己有做女團的條件，Winka聽後立即走去跟她度高，並說：「好似係我呀！」原來兩人的高度差不多。陳志雲問Gao如要她在隊員中揀一個做副隊長會選擇誰，Gao笑說：「揀個唔係好關事，Day（許軼）好想做，我揀Day！」Day說：「我要負責幫佢哋清點嘢食，然後自己拎晒啲嘢食，可以濫用職權！」Gao即說：「咁唔好喇，我想揀Candy，佢好似手機嗰嗰電用耐咗，好容易叉滿，又好容易冇晒，好跳㗎！但其實佢好好，又幾細心，佢唔係講啲咩嘢去陪伴你，佢係走埋嚟逗吓你，呢啲係好窩心。」Candy（王家晴）笑指自己因為有智慧，是智慧擔當，Gao則笑她是智慧擔憂。
爆谷一周丨COLLAR疫情下慘成「虛擬偶像」 Marf認未感受到做藝人感覺【下一頁】
與Gao同屬浸大dance society的芯駖，曾參與不少歌手的演唱會跳舞演出，她表示最開心是為台灣女歌手孫燕姿伴舞，一償心願，她說：「原本係冇乜機會，咁啱佢要搵香港排舞師，咁啱又差一個，咁啱我又做完郭富城，我就攝咗入去。佢係一個好有風度嘅藝人，會好照顧每個Dancer，記到晒我哋嘅名，呢個好重要，甚至向每人送咗一部iPad Pro，仲寫埋我哋同埋演唱會個名，畀我哋做留念。」
COLLAR接拍KFC爆脆雞廣告 為食Marf同So Ching開心到暈【下一頁】
陳志雲提到So Ching（蘇芷晴）與舞蹈員男友李啟言（Mo）的戀情，So Ching大方表示：「拍咗年幾，我都冇乜點數，我哋係跳舞認識。」現時So Ching已是幕前人，如果將來「甩拖」的話，她直言擔心有負面新聞出現，「本身我都唔想咁高調，但我冇得唔公開，因為認識我嘅人都知我哋拍拖，唔到我去唔承認，我冇諗過呢件事會有咁多人支持，正正有呢個能量，令到我哋更加穩定。」她大讚男友夠真，不會轉彎抹角。
此時，So Ching發現Winka（陳泳伽）在流淚中，Winka解釋：「好感觸，因為好少有呢啲時間相處，我覺得好開心，我連Gao讀電影都唔知。」芯駖說：「頭先我講嘅時候，我見你都已經有啲想喊。」Winka邊用紙巾拭淚邊回她：「係累積。」
口水多過浪花丨COLLAR成員Ivy So自爆食滯都想繼續食 Do姐鄭裕玲笑：咁咪好似金魚？【下一頁】
對於Ivy（蘇雅琳）為了《全民造星IV》而放棄還有3年便完成的中大護士課程，她說：「有啲人話會好可惜，其實做護士有好多前路，之前我好想有個學士學位，魚與熊掌，如果有樣嘢比學位係我更加想要嘅，我就揀呢度。當我去《造星IV》面試，我阿爸好嬲，媽咪幫我口，直到比賽中段，有日阿爸敲我房門，叫我『比賽加油！』，佢第一日同我講關於《造星》嘅嘢，我好感動，因為全家人都支持我。」Ivy在鏡頭前，多謝爸爸支持及理解，亦因她而感到驕傲。在旁的Marf（邱彥筒）和Winka不停拭淚，Marf說：「好感動，屋企人永遠都可以觸碰到每個人。」
COLLAR丨Marf留言不滿雜誌編輯狂踩底線 刪Po道歉認衝動：會虛心學習【下一頁】
提到Marf讀完中三後便轉校，她透露因為當時遇到不愉快經歷，轉到新學校後，她報讀了自己心儀的科目，順利完成中六課程。回頭想，她笑言幸好自己轉校，才有今日的她，「每個唔好嘅經驗，之後都會創造一個新嘅自己。」對於不愉快經歷，Marf直言已經選擇性忘記了，「某程度上有陰影，影響咗我對人際關係嘅恐懼，防備心重咗；多數都係冷暴力，冷暴力即係言語上，冇掂到我，感覺會令到我好唔舒服，好唔開心，或者唔想返學。」Winka亦遭外界抨擊外貌，她說：「好多人話我係咪得罪髮型師、化妝師，佢哋只係將最好嘅嘢擺喺我身上，大家唔鍾意係唔會打擊我嘅自信，反而我會擔心佢哋，佢哋放最好嘅嘢喺我身上，但我表現不到出嚟，我就有啲愧疚。」對於早前在IG埋怨雜誌編輯一事，Marf指自己好低能，她說：「其實我有記事嘅習慣，有時未必有簿喺身，我係會打字，嗰次咁啱撳錯掣，因為趕住拍嘢，真係Post咗，後來有朋友打畀我問，跟住我就delete番。呢件事純粹係態度、意見，大家又好少合作，安排上突然轉變，令到大家有衝突，我真係好低能。」
Day的爸爸是尼泊爾人，所以她有個尼泊爾名「Rejena Simkhada」。在16歲那一年，報名跳唱訓練，後來有機會到韓國訓練，全程免費，家人當時沒有反對，「每次放暑假或者放寒假就一定要過去韓國，所以16至18歲嘅假期都係嗰邊過。」被問到最大的得著，Day說：「心態，當初係抱住試吓、玩吓嘅心態，之後發覺自己認真鍾意呢樣嘢。」而這次訓練亦有助她參加《造星IV》。
Day@COLLAR自嘲有個「屎忽嘴」 校園生活常食撈麵慳錢【下一頁】
最後，8位成員要互選「香港小姐」，Candy自爆曾想過去選美，但因為要以泳裝示人，最後打消念頭。其他人則沒有想過去選美，Gao說：「應該係人哋話你靚，咁你覺得自己好靚，然後走去選美，我覺得件事好尷尬。」最後由Ivy被選為香港小姐，友誼小姐就由Winka獲得。
撰文：黃曉妍
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】